Vazindan rivoyat qilinadi: Bir kishi Nabiy ﷺ huzuriga kelib: «Yo Rasululloh, biz johiliyat ahli va butlarga ibodat qiluvchi edik, bolalarimizni oʻldirar edik. Mening bir qizim bor edi. U chaqirganimga javob beradigan boʻlganda, uni chaqirsam, chaqirganimdan xursand boʻlardi. Bir kuni uni chaqirdim, u ortimdan ergashdi. Men yurib, ahlimizdan uncha uzoq boʻlmagan bir quduq oldiga bordim. Uning qoʻlidan ushlab, quduqqa tashlab yubordim. Undan eshitgan soʻnggi soʻzim: ‹Otajon! Otajon!› degani boʻldi», dedi. Shunda Rasululloh ﷺ koʻzlaridan yosh tomguncha yigʻladilar. Rasululloh ﷺning yonlarida oʻtirganlardan bir kishi haligi kishiga: «Sen Rasululloh ﷺni gʻamgin qilding», dedi. U zot unga: «Toʻxta, u oʻzini tashvishga solgan narsa haqida soʻramoqda», dedilar. Soʻng haligi kishiga: «Gapingni menga qaytar», dedilar. U qaytardi. U zot yana koʻzlaridan yosh soqollariga tomguncha yigʻladilar. Soʻng unga: «Alloh johiliyat ahlidan ular qilgan ishlarni soqit qildi. Endi amalingni yangidan boshla», dedilar.Вазиндан ривоят қилинади: Бир киши Набий ﷺ ҳузурига келиб: «Ё Расулуллоҳ, биз жоҳилият аҳли ва бутларга ибодат қилувчи эдик, болаларимизни ўлдирар эдик. Менинг бир қизим бор эди. У чақирганимга жавоб берадиган бўлганда, уни чақирсам, чақирганимдан хурсанд бўларди. Бир куни уни чақирдим, у ортимдан эргашди. Мен юриб, аҳлимиздан унча узоқ бўлмаган бир қудуқ олдига бордим. Унинг қўлидан ушлаб, қудуққа ташлаб юбордим. Ундан эшитган сўнгги сўзим: ‹Отажон! Отажон!› дегани бўлди», деди. Шунда Расулуллоҳ ﷺ кўзларидан ёш томгунча йиғладилар. Расулуллоҳ ﷺнинг ёнларида ўтирганлардан бир киши ҳалиги кишига: «Сен Расулуллоҳ ﷺни ғамгин қилдинг», деди. У зот унга: «Тўхта, у ўзини ташвишга солган нарса ҳақида сўрамоқда», дедилар. Сўнг ҳалиги кишига: «Гапингни менга қайтар», дедилар. У қайтарди. У зот яна кўзларидан ёш соқолларига томгунча йиғладилар. Сўнг унга: «Аллоҳ жоҳилият аҳлидан улар қилган ишларни соқит қилди. Энди амалингни янгидан бошла», дедилар.